Ástin á tímum ömmu og afa

Út er komin bókin; Ástin á tímum ömmu og afa, eftir Önnu Hinriksdóttur. Er bókin unnin upp úr bréfum og dagbókum Bjarna Jónassonar kennara,  bónda, sveitarhöfðingja og samvinnumanns í Húnaþingi á ofanverðri 20. öld. Bókin byggir á lokaverkefni Önnu Hinriksdóttur til M.A.-prófs í hagnýtri menningarmiðlun frá Háskóla Íslands haustið 2008. Anna er dótturdóttir Bjarna og Önnu Sigurjónsdóttur í Blöndudalshólum í Blöndudal.

Mörg ástarbréfanna eru rituð á Syðri-Löngumýri í Blöndudal og fleiri bæjum og hefst eitt af bréfunum svona:

" Anna! Viltu verða konan mín? Heldurðu að þú getir elskað mig? Jeg bið  ekki einungis um hönd þína, jeg bið um hjarta þitt. Eigi ég ekki enn huga þinn, vonast jeg eftir að geta unnið hann,  því ástinni er ekkert ómáttugt."

Bjarni Jónasson ( 1891-1984 ) biðlaði fyrst bréfleiðis til Önnu Sigurjónsdóttur ( 1900-1993 ) 4. febr. 1920 og lét ekki hugfallast þó hann fengi afsvar í fyrstu.

Bjarni var kennari, fræðimaður, bóndi og sveitarhöfðingi og Anna var húsmóðir á bújörð þeirra hjóna Blöndudalshólum í Blöndudal. Þau voru meðal helstu máttarstólpa í sinni heimasveit og áttu ríkan þátt í uppbyggingu samfélagsins í Svínavatns- og Bólstaðarhlíðarhreppi í Austur-Húnavatnssýslu drjúgan hluta tuttugustu aldar.

Bókin  er gefin út af Háskólaútgáfunni í fræðibókaritröðinni Sýnisbók íslenskrar alþýðumenningar, sem ritstýrt er af sagnfræðingunum Davíð Ólafssyni, Má Jónssyni og Sigurði Gylfa Magnússyni.

 

Athugasemdir

[Ágústa Björg (IP-tala skráð) 6.5.2009 kl. 18:24]

Ég hlustaði á viðtal við Önnu á Rás 2 um daginn og það var ótrúlega áhugavert.  Þau skötuhjú hittust stundum á böllum í sveitinni og dönsuðu saman en yrtu ekki á hvort annað.  Síðan fór Björn heim og skrifaði ástmey sinni fögur ástarbréf hið sama kvöld og sendi henni.