Massey Ferguson multi power

Margir þeir sem hafa verið í sveit hafa glímt við það að koma traktornum hraðar en almenn venja var. Var þá einatt gripið til þess ráðs að svindla á olíugjöfinni til að bæta við aflið. Sumir höfðu þann háttinn á að láta fríhjóla niður brekkur. Það var að vísu varasamt því dráttarvélar eru ekki á fjöðrum og oft fór vélin að hoppa þegar miklum hraða var náð. Ekki bætti úr skák þegar átti að fara að bremsa. Þá gátu bremsurnar tekið skakkt í og viðkomandi komin langleiðina út í skurð. Allt var þetta hægt því engin var löggan.

Mikið breyttist þegar Massey Ferguson kom með hátt og lágt drif en gamli Ferguson gráni var einungis með 4 gíra. Byltingin að mínu mati var þegar Massey Ferguson kom með svokallað multi power sem var overdrive. Þá gátu menn þeyst á mikilli ferð. Nú eru vélar búnar miklum möguleikum til hraðaksturs. 

Massey Fergusoninn sem prýðir þessa bloggsíðu er ein af fyrstu vélunum  sem kom í Austur-Húnavatnssýslu árgerð 1958.

Á ólöglegum hraða á traktor

Borgarahreyfingin

Borgarahreyfingin er sjálfsprottin pólitísk hreyfing, sprottin úr grasrót íslenskrar alþýðu og almúgafólks. Hreyfingin verður til eftir bankahrunið þegar í ljós hefur komið að heimskan hefur riðið röftum í íslensku  bankakerfi svo og víða í atvinnulífi.  Eftir að þjófélagið hefur verið drifið áfram af erlendri skuldasöfnun og stjórnvöld hafa látið í áraraðir viðskiptahalla viðgangast. Markaðurinn átti að stýra öllum athöfnum og hreyfingum í þjóðfélaginu. Þá virtist það bara hafa vera blöff.

Borgarahreyfingunni hefur tekist að bjóða fram lista í öllum kjördæmum sem er afrek út af fyrir sig. Hún glímir við ójafnræði miðað við önnur stjórnmálaöfl sem eru með kjörna fulltrúa á Alþingi og sem fá framlög á fjárlögum miðað við stærð. Af þeim sökum verður Borgarahreyfingin að baka sitt bakkelsi sjálf, til nota á kosningaskrifstofum, en getur ekki farið út í bakarí að kaupa vínarbrauð fyrir skattfé. Eins verða meðlimir og kjósendur hennar að taka myndir hvor af öðrum og láta það duga, því hreyfingin hefur ekki efni á að fara á auglýsinga- og ljósmyndastofur.

Atvinnuleysi hér er orðið gríðarlegt og má búast við að sá stóri hópur horfi frekar til Borgarahreyfingarinnar um ráð og breytingar, en annarra flokka sem nú um stundir snúast um sjálfa sig í leit að fjármunum til endurgreiðslu styrkja sem þeir hafa hlotið fyrir vasklega framgöngu á vettvangi þjóðmála.

Krafan um breytt þjóðfélag og betra skipulag er mjög rík í nú á dögum og þeir sem vilja breytingar leita að sínum möguleikum þar um.

Í skoðanakönnunum hefur fylgið við hreyfinguna verið að vaxa hægt og sígandi og því er spáð að, svo verði fram á kjördag. 

Þetta verða spennandi tímar framundan, eins og sagt var fyrir bankahrun, ef fréttist að einhver hefði keypt eitthvað af einhverjum.

Borgarahreyfingin býður fram í öllum kjördæmum

Björgun heimasætunnar í Laugarnesi vorið 1952

Frásögn þessi var fyrst flutt á samkomu fyrrverandi íbúa í Laugarneskampi og Laugarnesi árið 2003. Hún er sögð í minningu um bróður minn Birgir Gunnarsson, sem fórst með vitaskipinu Hermóði 18. febrúar 1959 í Reykjanesröst. Ég skrásetti hana til að halda atburðinum til haga og bregða minningarglampa á Laugarnesið.

Birgir skildi ekki eftir sig veraldlega hluti. Björgun Þuríðar Sigurðardóttur, sem er ein ástsælasta söng-, hesta- og listakona þjóðarinnar, er okkur í fjölskyldunni mikilsvirði.

Frásögnin var endurflutt í styttri útgáfu í minningarathöfn um Birgi í Laugarneskirkju 18 febrúar 2009 og þykir mér vel viðeigandi að birta hana á páskadagsmorgun og á þeim tíma sem margir eru að fermast en Birgir var ásamt félaga sínum, einmitt að koma úr fermingarkaffi þegar þessi atburður átti sér stað.

Björgun heimasætunnar í Laugarnesi vorið 1952

Það var á þeim vordögum í Laugarnesinu, þegar krían smó bláan himininn með sínum öruggu vængjatökum. Ósjaldan steypti hún sér niður í höfuðið á okkur krökkunum í Laugarnesinu og flaug svo burt - gargandi. Eftir skildi hún okkur skíthrædd og æpandi, hlaupandi burt sem fætur toguðu, því krían var óskaplega herská og hættuleg að okkur fannst.

Kolinn var farinn að veiðast við bryggjuna á Kirkjusandi, en það var háttur margra unglinga að standa á ystu nöf og stinga hann þegar hann gekk upp í sandinn.

Í haga í Laugarnesinu voru grá hross á beit. Af þeim var yndisleg lykt á vorin sem minnti á sumarkomuna og í hlaðvarpa sýslaði Sigurður bóndi við bústörf - syngjandi sæll og glaður.

Inn í Laugarnesbænum var heimasætan Þuríður Svala Sigurðardóttir - fjögurra vetra gömul - og öngvir vissu framtíð hennar.

Fremst á nesinu kúrði svo braggabyggðin undir bárujárnsboganum.

Þetta vor árið 1952 átti Birgir bróðir minn að fermast ásamt öðrum börnum úr Laugarnessókn. Einn dag eftir fermingu gengu þeir vinir og félagar, Birgir og Ágúst, til kveðjukaffiboðs hjá séra Garðari. Þeir voru spariklæddir. Var þetta hin besta veisla og fannst nú krökkunum þau vera fær í flestan sjó.

Á heimleiðinni drolluðu drengirnir og skröfuðu um heima og geima - enda drengja háttur á þessum aldri. Þeir ákváðu að taka á sig krók og kíkja niður á bryggju við frystihúsið á Kirkjusandi. Þeir voru að vísu í sparifötunum - en ævintýraþráin er sterk og oft voru krakkar að veiða þarna.

Þegar þeir nálguðust bryggjuna heyrðu þeir hróp og köll. Hér var eitthvað á seyði.

Þegar þeir komu nær sáu þeir að einhver hafði dottið í sjóinn. Viðkomandi flaut eins og bauja frá landi og sogaðist í burtu. Það fór ekki á milli mála að heimasætan í Laugarnesi var að drukkna. Ævar bróðir hennar baðaði út öllum öngum, var óðamála og kallaði á hjálp.

Án þess að hika vatt Birgir bróðir sér úr jakkanum og á svipstundu hafði hann kastað sér til sunds á eftir Þuríði Svölu. Hann synti að stúlkunni, náði haldi á henni og hóf svo björgunarsund til lands en það reyndist erfitt.

Ránardætur vildu fanga ungmennin.

Það virtist eins og þau væru að sökkva.

En heilladísirnar í Laugarnesi voru þarna líka og þær slógu skjaldborg um þennan atburð.

Birgir þreytti sundið af einbeitni en mjög var farið að draga af honum og stúlkan farin að toga í. Við þessar aðstæður stökk félagi Ágúst fram af kantinum og aðstoðaði Birgi við að ná til lands. Það voru fúsar hendur sem hjálpuðu þeim að ná upp á bryggjukantinn.

Tilviljunin ein réð því að danskur læknir var þarna nálægt. Kom hann til hjálpar og gerði viðeigandi ráðstafanir. Allt fór þetta vel að lokum.

Þeir félagar Ágúst og Birgir gengu nú heim til sín, báðir holdvotir en með sæluhroll og blik í augum eftir giftusamlega björgun stúlkunnar.

Þegar Birgir kom heim varð nú heldur en ekki upplit á móður okkar - enda var hann í fermingarfötunum og ekki vel séð að eyðileggja þau. Helst væri hægt að lýsa því ástandi sem þarna skapaðist með því að fara með Guttavísur. En þegar skýringar á atburðinum komu smátt og smátt fram milli glamrandi tannanna færðist gleðisvipur yfir andlit móður okkar.

Nokkrum dögum seinna komu Laugarnesfeðginin, þau Sigurður Ólafsson og Þuríður, til okkar að Laugarneskamp 36. Þau voru í sínu fínasta pússi og heimasætan með slöngulokka og elegant.

Á meðan kvöldsólin varpaði geislum sínum á drossíuna sem þau komu í afhentu þau Birgi björgunarlaun sem voru stytta af hafmeyjunni eftir Guðmund frá Miðdal og álitleg peninga upphæð.

Þetta vor gekk ég um Laugarnesið - sex vetra gamall - og fannst ég vera hluti af einhverju miklu afreki - einhverju stórkostlegu afreki.

Já, mér fannst að bróðir minn væri hetja.

Og krían - hún skyldi nú bara passa sig. Ég átti bróðir sem kæmi bara að fæla hana í burtu. Hann væri sko ekkert hræddur - hann væri ekki hræddur við eitt né neitt.

Heimildir: Í söngvarans jóreyk. Æviminningar Sigurðar Ólafssonar söngvara.
Munnlegar heimildir: Halldóra og Kristbjörg Gunnarsdætur.

Fast þeir sóttu

Sagt hefur það verið um Suðurnesjamenn,
fast þeir sóttu sjóinn og sækja hann enn.

Grindvíkingar bera sigurorð af KR.

Það er seiglan, dugnaðurinn, útsjónarsemin, kjarkurinn og körfuboltamenningin, sem færir þeim sigurinn.

Til hamingju Grindavík.

Stórsigur Grindvíkinga gegn KR

Ég veit ekki neitt

Þetta er allt fært rafrænt. Þess vegna veit engin neitt. Eins er með allt fjármagnsflæði milli landa. það er fært rafrænt og gjaldkerinn getur verið í kaffi. Það veit engin neitt. Þetta er eins og Þjórsá. Það er ekki hægt að fara telja lítrana sem renna í henni. Hún bara rennur. Að vísu er orkunni tappað af henni og andvirðið rennur rafrænt inn á reikning.

Það eina sem er handfært nú til dags er þegar Mæðrastyrksnefnd og góðgerðarstofnanir fá styrk þá er það handsalað með mjög stórri ávísun og kemur mynd í sjónvarpinu af viðkomendum. Þannig ætti það að vera með stjórnmálaflokkana með styrk yfir 3 milljónir. Menn tækju við þessu með bros á vör og segðu hvort þeir ætluðu að kaupa vínarbrauð eða auglýsingu.

Hér veit engin neitt. Þess vegna er svona komið fyrir okkur. Alveg sama þó menn stjórni heilu stjórnmálaflokkunum eða bönkunum. Það veit engin neitt. Þetta eru allt trúnaðarmál.

Ég vona bara að bændur viti hvenær sauðburður hefst í vor, svo hann komi þeim ekki á óvart.

Guðlaugur Þór hafði forgöngu um styrkina

37 milljónir í tap 2007

Sjálfstæðisflokkurinn var með 37 milljónir í tap á samstæðureikningi sínum 2007. Reyndar voru allir stjórnmálaflokkarnir með tap á rekstrarreikningi 2007. Einhvern vegin verður að afla fjár til að fjármagna halla í rekstri. Varla er hægt að tína dósir upp í tapið eða selja kleinur. Þess vegna er auðveldast að láta þá sem þykjast eiga peninga borga. En að láta húkka sig svona rétt fyrir kosningar er svakaleg. Hver kjaftaði eiginlega frá? 

Sjálfstæðisflokkurinn sker sig úr með að vera einn flokka, sem sem er með réttan höfuðstól. Flokkurinn er með eigið fé að upphæð kr. 386 milljónir og þar af veltufjármuni kr. 51 milljónir. 

Aðrir flokkar eru með öfugan höfuðstól þ.e. skulda meir en þeir eiga. Það þýðir ekki að þeir séu gjaldþrota á meðan þeir geta staðið í skilum.

Ég legg til að stjórnmálaflokkarnir komi sér upp bás í Kolaportinu og annarstaðar út um land og selji þar bílskúrsdót, til fjáröflunar, frá almenningi. Frambjóðendur geta verið þar að afgreiða og komist þannig í bein tengsl við kjósendur. Þetta gæti sparað flokkunum ýmis útgjöld svo sem auglýsingar o.þ.h.

Skilað til lögaðila

Stórhætta hjá Framsókn

Jón Magnússon fráfarandi alþingismaður segir á bloggsíðu sinni, að það sé með ólíkindum að formaður Framsóknarflokksins veitist að þingflokki Framsóknar, þegar hann segist mótfallinn frumvarpi ríkisstjórnarinnar um greiðsluaðlögun. Jón Magnússon segir ekki nema hálfa söguna.

Sigmundur Davíð segir að frumvarpið sé stórhættulegt standi það eitt og sér án annarra úrræða. Það verður að hafa rétt eftir. Þetta er sennilega rétt hjá formanni Framsóknarflokksins, það þarf að gera ýmislegt annað meðfram.

Formaður Framsóknarflokksins er væntanlega búin að lesa skoðanakönnun úr Kraganum um að Framsókn missi þar þingmann. Í síðustu Alþingiskosningum komst þingmaður Framsóknar þar, naumlega inn á síðustu metrunum.

Allt stefnir í mikinn sigur Samfylkingar og VG og óvíst hvort þeir þurfi stuðning Framsóknar þó ekkert sé gefið í þessum efnum. Nú eru þær aðstæður upp að ekki er hægt að fá lánsfylgi frá öðrum flokkum. Þess vegna gætu þær aðstæður skapast að atkvæði greidd Framsóknarflokknum falli dauð og ónýt niður.

Þessi vísbending í Kraganum er ekki gæfuleg um væntanlegan árangur í Reykjavíkurkjördæmunum þó ekkert liggi enn fyrir um árangur þar. Framsókn rær því lífróður núna.

Þess vegna er það nauðsynlegt fyrir Framsókn að vera bæði með og móti til að afla atkvæða. Það er list stjórnmálanna. 

Þeir eru margir skynsamir framsóknarmennirnir, þó þeir eldri mennirnir hafi stundum lent í vondum félagsskap svo sem við einkavæðingu bankanna og útfærslu kvótamála bæði í sjávarútvegi og landbúnaði.

Greiðsluaðlögun stórhættuleg ein og sér

Rétt pólitísk greining

Listi fullveldissinna hefur frestað framboði sínu þangað til í næstu kosningum, er það ekki réttur skilningur? Mér sýnist að fólkið sem fór fyrir framboðinu hafi metið stöðuna rétt hvað varðar það að Vinstri grænir og Sjálfstæðisflokkurinn fóru varlega í ályktunum um Evrópumálefni. Í þessum flokkum er það mikil andstað fyrir aðild að hún mun varla vera á dagskrá. Flokkarnir gátu beislað málefnið og komið í veg fyrir flöktfylgi sem Fullveldissinnar hefðu sótt í.

Bleyta er komin í púðrið hjá Samfylkingunni varðandi Evrópumálefnin og þeir hafa enga stöðu til að vera með hótanir gagnvart öðrum flokkum lengur. Hitt er svo annað mál að það getur alltaf þurft að gera einhverskonar hliðarráðstafanir með samninga gagnvart öðrum þjóðum og alltaf getur rekið á fjörur okkar einhverjar lausnir, sem geta komið að gagni.

En þannig er það nú, við getum ekki gefið fullveldið og lagasetningarvaldið frá okkur það er of mikið búið að hafa fyrir því að öðlast það.

Ég tel að með því að láta hreyfinguna lifa sem frjálsa framboðs-og sjálfstæðishreyfingu séu fælingaráhrif hennar mikil. Ég óska henni velfarnaðar.

Hættir við þingframboð

Loðin yfirlýsing VÍS

Vátryggingafélag Íslands hefur sent frá sér yfirlýsingu vegna fréttar Mbl.is um 200 milljóna veð í sveitarsetri Sigurðar Einarssonar.

Þar segir:

Í frétt Morgunblaðsins er ranglega haldið fram að Veiðilækur ehf. skuldi Vátryggingafélagi Íslands 200 milljónir króna. Hið rétta er að Veiðilækur ehf., sem er félag um jarðeign og húsbyggingu við Norðurá í Borgarfirði, fékk 75 milljón króna lánsfjármögnun frá Vátryggingafélagi Íslands gegn veðtryggingu að fjárhæð 200 milljónir króna. Vátryggingafélag Íslands telur því tryggingar fyrir þessari lánsfjármögnun traustar.

Ég skil þetta svo að Veiðilækur ehf hafi fengið 75 milljónir í lán frá VÍS gegn veðtryggingu að fjárhæð 200 milljónir króna. Hér kemur ekkert fram í framangreindri yfirlýsingu hverskonar 200 milljónir þetta séu. Er þetta skuldabréf sem Sigurður afhendir VÍS til tryggingar fyrir því að standa í skilum? Er þetta hlutabréf í einhverju hlutafélagi? Er þetta veðréttur í jörðinni? Eru þetta framtíðar arðgreiðslur af veiðirétti? Hvaða verðmæti eru þetta og af hverju þurfa þau að vera að upphæð 200 milljónir en ekki bara lánsupphæðin 75 milljónir?

Þegar svo er komið að Vátryggingafélag Íslands sem starfar á almennum markaði er komið í þá stöðu á markaði að eitthvað sé sé vafasamt eða orki tvímælis verður það að greina skýrar frá.

Ég hef átt farsælt samstarf við VÍS áður Samvinnutryggingar í 44 ár og vil endilega að félagið hafi hreinan skjöld og hlutina í lagi eins og kostur er miðað við aðstæður nú.

200 milljóna veð í sveitasetri

Engir leynifundir

Færslan hér að neðan um sameiningu Frjálslyndra og Borgarahreyfingunnar er aprílgabb og ekki fótur fyrir henni.

Aftur á móti veit ég ekki alveg hvort ég hafi hlaupið 1. apríl eða ekki. En það var ríkur vilji til þess hjá mér og ég er ekki búinn að fá botn í það mál enn.

Þannig var að ég skrapp til Selfoss eftir vinnu og heyrði í útvarpinu  að það ætti að bjóða upp flotta bíla hjá Sýslumanninum í Skógarhlíð í Reykjavík. Ekkert lágmarksverð. Ég var nærri búinn að snúa við. Ég veit ekki hvort þetta var aprílgabb eða ekki. Hef ekkert séð um þetta í fjölmiðlum. Kannski verður þetta á morgunn!!!???