Lóðarleiga sumarhúsa á Þingvöllum

Lóðarleigusamningar við sumarhúsaeigendur innan þjóðgarðsins á Þingvöllum runnu út um mitt síðasta sumar, en voru framlengdir til áramóta 2010-2011.

Þingvallanefnd með alþýðuforingjana Álfheiði Ingadóttur, Björgvin G. Sigurðsson , Þráinn Bertelsson hafa nú framlengt lóðarleigusamning til 10 ára og er nú verið að ganga frá undirritun þeirra samninga.

Leiguupphæðin er 219 kr pr. lóð að lámarki á dag.

Ég hef ekki komið auga á lagaskyldu Þingvallanefndar til að framlengja þessa samninga eða að leysa sumarbústaðina til sín á matsverði. Auk þess er spurning hvort það sé samrýmanlegt að vera með sumarbústaði innan þjóðgarðs og hvort það samrýmist reglum um fornminjaskráningu svæðisins á heimsminjaskrá Unesco.

Í staðin fyrir að framlengja lóðarleigusamningana til 10 ára, átti vitaskuld að semja brottfaraáætlun um rýmingu svæðisins. Hvort sem áætlunin hljóðað upp á 5 eða 10 ára aðlögunartíma. Hús hafa oft verið flutt á Íslandi. Þannig þurfti að flytja hús úr Skerjafirði í Laugarnes á sínum tíma vegna gerð Reykjavíkurflugvallar og vafðist það ekki fyrir mönnum.

Nei í staðin fyrir það heykjast alþýðuforingjarnir  í hnjánum og veita samningum upp á 219 kr brautargengi til 10 ára í þjóðgarðinum.- 19 kr hærra en almúginn verður að borga til að fá að fara á kamarinn á Þingvöllum.

Það er svo sjálfstætt rannsóknarefni hver gaf leyfi fyrir byggingu sumarhúsa á Þingvöllum á sínum tíma og hvernig stóð á því.

Gjaldtaka á Þingvöllum

Athugasemdir

[Árni Gunnarsson, 20.4.2011 kl. 11:16]

Alþýðuforingjarnir, já? Þetta eru dálítið óvenjulegar vangaveltur hjá þér um óbreytta stöðu forgangshópsins á Íslandi. Það hefur ekkert breyst. Það var víst aldrei skrifuð nein rannsóknarskýrsla- eða var hún bara kannski ekki lesin?

Ég ber að nokkru ábyrgð á setu Þráns Bertelssonar á Alþingi því hann var í framboði í mínu kjördæmi. Ég sé eftir þessum Þráni sem ég taldi mig vera að kjósa og hef litlar mætur á þessum manni sem mætti í hans stað inn á Alþingi. Mér finnst Þrainn líkjast Steingrími J. Gaman að hlýða ræðurnar og þar með búið.

En hvað er að, af hverju er ekki neitt gert af viti á Íslandi, eins og við eigum mikla möguleika og eigum að geta verið ánægð í þessu besta landi heimsins?

[Þorsteinn H. Gunnarsson, 20.4.2011 kl. 17:07]

Árni, ég hef nú svona verið að velta þessum málefnum innan Þjóðgarðsins fyrir mér, vegna þess að leið mín lá um Þjóðgarðinn í sumar. Þá kom ég að gaddavírsgirðingu og komst ekki eftir vatnsbakkanum en var samt innan Þjóðgarðsins

Mér fannst þetta frekar óþægilegt.