Viðbætur við markaskrá

Markaskráin íslenska fjallar um eyrnamörk-fjármörk. Fjármörk helga eiganda fé. Fé er dregið úr almenningum í dilka. Það er löglegt ef rétt er dregið.

Grágás, lagasafn íslenska þjóðveldisins getur um fjármörk og eru þau þar kallaðar einkunnir.

Áður fyrr var markaskrá gefin út á einhverra ára fresti, en ef við bættust upplýsingar á tímabilinu um ný fjármörk, var gefin út svokallaðar viðbætur við markaskrá.

Nú eru uppi þeir tímar, að áhöld eru uppi um að fé hafi verið löglega dregið úr almenningum í prívat dilka. Hefur Alþingi kvatt upp nefnd valinkunns sómafólks til að upplýsa um atburði varðandi fénaðar ferð,  hugsanlegar fjárgötur og lausagöngu fjár og umsýslu og fjárdrátt.

Skýrsla þessi kvað vera fullabúin og ber brýna nauðsyn til að hún sé birt, svo almenningur geti farið að lesa hana á kvöldvökum og við húslestra.

Nú held ég að best sé að fara með rannsóknarskýrslu Alþingisnefndarinnar eins og með markaskrána að birta hana strax og fresta ekki lengur framlagningu hennar.

Andmælabréfin og svör við þeim er svo hægt að gefa út síðar sem viðbót við rannsóknarskýrsluna og hafa hana í vönduðu bandi þannig að almenningur geti lesið viðbæturnar og haft þær við höndina og gæti það verið jafnvel gleggra að hafa þann háttinn á. Vitaskuld verður þetta svo allt saman birt á tölvutæku formi.

Senda út athugasemdabréf

Athugasemdir

[Sigurður Haraldsson, 10.2.2010 kl. 07:59]

Við skulum lesa rétt á mörkin því að þegar dregið er til slátrunar viljum við ekki gera mistök!

[Þorsteinn H. Gunnarsson, 10.2.2010 kl. 17:00]

Alveg hárrétt hjá þér Sigurður, og svo fara sumir í ómerkingadilkinn.

Og þeir sem draga sér annarra manna fé eru kallaðir sauðaþjófar.

Þannig hafa nú þessi mál verið skilgreind allt frá landnámi og engin ástæða eða tilefni til að þjóðin gefi afslátt af þessum viðmiðum.

[Sigurður Haraldsson, 10.2.2010 kl. 23:42]

Enda um gömul og góð viðmið að ræða.