Forsetabardaginn

Fundurinn var settur á réttum tíma.

Gengu þau þá tvö fram Andrea og Ari Trausti og lásu upp yfirlýsingu. Voru þau óánæg með tilhögun og uppsetningu á fyrirkomulagi fundarins. Gekk þá Hannes Skagfirðingur inn í þvöguna og veitti liðsinni.

Fát nokkurt kom á þáttastjórnendur við þessi tíðindi enda töldu þeir sig öllu ráða á vettvangi, eins og alsiða er þar sem menn eru húsbændur.

Gengu þá þremenningarnir snúðugt út en þó án hávaða. Nokkurt kurr og andvörp heyrðist í vorblíðunni frá heimilum landsmanna.

Varð af þessu allmikill liðssamdráttur í Skagafirði um Vestfirði og höfuðborgarsvæðið.

Herdís vildi vera um kjurt á palli en sagðist styðja brottgöngu fólk.

Var nú þáttastjórnendum vandi á höndum þar sem eftir vöru þrír kandídatar en aðeins tvö púlt.

Ólafur varði annað púltið og var engu um þokað en Herdís og Þóra deildu púlti saman og var þröngt um ræðumenn þó mikið pláss væri á sviðinu.

Síðan byrjuðu spurningar og svör. Þáttastjórnendur réðu ekki neitt við neitt og setti Ólafur á langar einræðu eins og títt er um einbirni þegar þau tala við sjálfa sig.

Margt var skrafað á Tvitter og var svo útsendingu á Stöð 2 læst eftir því sem fregnir herma.

Lýkur hér svo að segja frá forsetabardaga sem sendur var út í beinni.

Yfirgáfu kappræður í Hörpu

Athugasemdir

[hilmar jónsson, 4.6.2012 kl. 21:21]

Til hamingju með að vera kominn í elítureit moggabloggsins.

[Þorsteinn H. Gunnarsson, 4.6.2012 kl. 21:58]

Það er langt síðan. Takk fyrir.

En er einhver hamingja að vera stritandi hér á Moggablogginu kauplaus, klórandi sér í hausnum hvað eigi að setja næst inn?

[hilmar jónsson, 4.6.2012 kl. 22:08]

Þú hlýtur bráðum að fara að fá laun ( í einhverri mynd )

Annars les ég þig reglulega og líkar vel við bloggið þitt.

[Þorsteinn H. Gunnarsson, 4.6.2012 kl. 22:19]

Nei, ég kem ekki til með að fá laun frekar en aðrir bloggarar.

Þetta er  ágætt svona. Það er sama hér, ég fylgist með þér.